Захирал Д.Буянтогтох, төслийн удирдагч Физикийн тэнхимийн дэд профессор Т.Улаанбаатар, Химийн инженерчлэлийн салбарын профессор П.Мөнхбаатар нар Тайвань-Монголын хамтарсан төслийн хүрээнд 3-р сарын 11-18-ны өдрүүдэд Тайвань Үндэстний Их Сургуулийн (NTU) Хүрээлэн байгаа орчны инженерчлэлийн ахисан түвшний хүрээлэнд айлчлаад ирлээ. Төслийн үр дүнгээр уулзалт, ярилцлага зохион байгуулж, цаашид ажиллах чиглэл, судалгааны арга зүйн төрлүүдийг сонголоо. Мөн Тайваний усан сан, хиймэл нууруудын усны хими, бактериологийн мониторингийн байдалтай танилцлаа. Тус хүрээлэн 300 орчим магистрант, 80 докторанттай сургалт, судалгаа явуулдаг юм байна. Хүрээлэнгийн эрдэмтэд бүгд АНУ-ын их сургуулиудад эрдмийн зэрэг цол хамгаалсан аж. Иймээс манай сургуулиас магистр, докторын сургалтад багш нараа явуулах боломжийн талаар ярилцаж, урьдчилсан тохиролцоонд хүрлээ. Хамтарсан төсөл 2015 оны 9-р сараас Өгий нуур, Тэрхийн Цагаан нуур, Хөвсгөл нуурын усны чанарын судалгааг эхэлсэн бөгөөд 3 жил үргэлжлэх юм.